IBINABA na ng Department of Budget and Management (DBM) sa National Food Authority (NFA) ang P1,182,905,000 na pondo para sa pagbibigay ng one-time rice assistance sa lahat ng kwalipikadong empleyado ng gobyerno.
Inaprubahan ni DBM Secretary Amenah Pangandaman ang Special Allotment Release Order (SARO) at ang kaukulang Notice of Cash Allocation (NCA) noong Abril 12, 2023.
“As directed by President Ferdinand R. Marcos Jr., we shall ensure the welfare of our government workers by giving them assistance for their household needs and, at the same time, boosting the production of our rice farmers,” pahayag ni Pangandaman.
Nasa 1,892,648 na government workers ang inaasahang makikinabang mula sa assistance, kasama na rito ang mga Job Order (JO) at Contract of Service (COS).
Sa pinirmahang Administrative Order No. 2 ni Pangulong Marcos Jr., nakasaad ang pagbibigay ng one-time assistance na may timbang na 25 kilong bigas para sa lahat ng mga kwalipikadong empleyado.
Ang rice assistance ay ibibigay sa mga benepisyaryo na kasalukuyang naninilbihan sa gobyerno at mga empleyado ng iba’t-ibang ahensya hanggang noong Nobyembre 30, 2022.