NAKORNER ng mga tauhan ng Bureau of Immigration (BI) ang 53-anyos na si Pascal Didier Gillot, na tinutugis ng mga awtoridad sa bansang France dahil sa mga kaso ng sexual abuse sa mga menor de edad sa kanyang bansa.
Target si Gillot ng pinalabas na Mission Order ni Immigration Commissioner Jaime Morente dahil na rin sa pagiging panganib nito sa kaligtasan at seguridad ng publiko.
Nahuli ang dayuhan sa A. Masangkay St. sa San Roque, Antipolo City.
Sinabi ni Morente na humingi ng tulong ang French authorities para madakip ang suspek dahil na rin sa mga kaso ng panghahalay sa mga kabataan.
Ayon pa.kay Morente, isinama na rin si Gillot sa red notice ng Interpol.
Siya umano ay nanghalay ng kabataang nagkakaedad ng 15 anyos pababa at mayroong warrant of arrest dahil sa mga kasong panghahalay sa mga kabataan.
Bukod dito, ilang beses din nitong tinangka na tangayin ang batang biktima, na labag sa Penal Code ng Pransiya.
Nadiskubre din na overstaying na rin sa bansa ang suspect na nakakulong sa Warden Facility sa Bicutan, Taguig, habang hinihintay ang deportation proceedings laban dito.