Wala umanong napapag-uasapan kung may kahilingan ang Catholic Bishops Conference of the Philippines (CBCP) na dagdagan ang kapasidad ng mga simbahan para sa vaccination program ng pamahalaan.
Ayon kay Manila Vice Mayor Honey Lacuna-Pangan sa ginanap na virtual forum ng Department of Heatlh (DOH), ang napag-uasapan lamang aniya ng pamahalaang lungsod ng Maynila sa pangunguna ni Manila Mayor Isko Moreno Domagoso kasama si Bishop Broderick Pabillo ay ang iniaalok na mga simbahan at mga eskuwelahan na maaaring gawing vaccination sites.
Ito ay kasunod umano ng panawagan na dagdagan ang kapasidad sa simbahan .
Sinabi pa ni Lacuna-Pangan na wala namang nabanggit si Bishop Pabillo sa kanila na humihiling sila na taasan o dagdagan ang kapasidad sa simbahan.
Ang 50-percent capacity na ibinigay naman aniya sa kanila ay tolerable naman para sa vaccination program dahil kaya naman aniyang ipatupad ang mga health protocol.
Napag-usapan lamang na tutulong ang simbahan kung saan bubuksan ang kanilang mga paaralan at simbahan para makatulong sa vaccination site para sa lungsod ng Maynila.
Sinabi naman ni Health Usec. Maria Rosario Vergeire na kailangan pa ring dumaan sa IATF ang mga ganitong bagay.
Ayon kay Vergeire, kapag may nagre-request na mga sector para magkaroon ng kaunting kaluwagan sa itinalagang pamantayan ng IATF ay kailangan munang dumaan sa proseso.
Kailangan lamang umanong magsumite ng request letter sa IATF upang matalakay ng mga opisyal.