ANG kauna-unahang multi-purpose evacuation center sa Metro Manila na mula sa Philippine Amusement and Gaming Corporation (PAGCOR) ang itatayo sa lungsod ng Caloocan.
PInangunahan ni Caloocan City Mayor Oscar Malapitan ang ground breaking ceremony para sa two-storey Multi-Purpose Evacuation Center na itatayo sa Phase 1 Barangay 171 ng lungsod.
Lubos na nagpasalamat si Mayor Oca sa pagpili ng PAGCOR sa lungsod para maging benepisyaryo nang kapaki-pakinabang at napapanahong proyekto na pinondohan ng P50 milyon ng PAGCOR.
“Mapalad po ang Lungsod ng Caloocan sapagkat tiyak na makatutulong ito sa ating Disaster Management and Rescue Operations na siyang magsisilbing ligtas na kanlungan ng ating mga mamamayan sa oras ng pangangailangan,” ani Mayor Oca.
Isa aniya ang Disaster Management and Rescue Operations sa kaniyang binibigyan prayoridad simula nang manungkulan ito bilang alkalde ng Caloocan, kabilang na riyan ang pagtatatag ng 24/7 command center, pagpapatayo ng Rescue Building at pagbili ng mga kagamitan para sa rescue operations.
“Sa ngalan po ng Pamahalaang Lungsod ng Caloocan, nagpapasalamat po kami sa PAGCOR sa pagpili sa aming lungsod bilang kauna-unahang siyudad sa NCR na pagtatayuan ng napakagandang proyektong ito. Asahan po ninyo na ito ay ating pahahalagahan at gagamitin para sa kapakanan ng mga taga-Caloocan,” dagdag ni Malapitan.
Kasama rin dumalo sa groundbreaking ceremony sina Cong. Along Malapitan, PAGCOR Chairperson and CEO Andrea Domingo, PAGCOR Assistant VP for Community Relations Services Ramon Villaflor, PAGCOR Special Projects Division Senior Manager Maria Eliza Cruz, Caloocan City Administrator Engr. Oliver Hernandez, City Disaster Risk Reduction and Management Office head Dr. James Lao.