INIULAT ng Department of Health (DOH) na mayroong 8.42 percent vaccine wastage hanggang Agosto 12 ng taong ito.
“The Philippines reported 8.42 percent COVID-19 vaccine wastage as of August 12, 2022,” sabi ni DOH officer-in-charge Maria Rosario Vergeire sa Senate committee on health and demography hearing.
Ang nasabing porsyento ng vaccine wastage ay mas mababa sa 10 percent indicative wastage rate ng World Health Organization(WHO).
Ayon kay Vergeire, ilan sa mga dahilan ng vaccine wastage ay ang expiration, operations-related issues kabilang ang mga bakuna na nabuksan ngunit hindi naiturok, spillage, broken vials, backflow, leftover underdose, at iba pa.
Binanggit din ng opisyal na mayroon ding nasayang dahil sa kalamidad tulad ng bagyong Odette noong 2021, sunog at lindol.
Mayroon ding mga bakuna na hindi nagamit dahil sa mga isyu sa pagkontrol sa temperatura.
Isinagawa ng Senate health and demography ang unang pagdinig upang talakayin ang pangkalahatang sitwasyon sa kalusugan sa bansa, sitwasyon ng COVID-19, dengue, updates sa pagpapatupad ng Universal Health Care Law, pagpigil sa monkeypox, at pagbili at pagbibigay ng COVID-19 vaccines.