IDINEKLARA ng National Museum of the Philippines (NMP) bilang isang important cultural property (ICP), ang 408 taong gulang na San Bartolome Parish Church ng Malabon City , ayon sa Catholic Bishops Conference of the Philippines (CBCP).
Sinabi ni NMP Deputy Director-General for Administration Ma. Rosene Flores-Avila sa pag-unveil ng marker ng deklarasyon noong Huwebes na hinimok nila ang mga opisyal ng parokya na panglagaan ng husto ang simbahan.
“Let us be partners in preserving it for future generations,” Avila said. “Let us continue to make this hallowed place a vibrant center of conversation and action for our cultural heritage, especially now that we face more challenging times.”
Sinang-ayunan naman ng Diocese ng Kalookan na siyang nangangasiwa sa parokya ang panawagan.
“We really must take seriously our partnership with the proper government agency for the preservation of our church cultural heritage,” sabi ni Bishop Pablo Virgilio David.
Ang National Heritage Act of 2009 ay tumutukoy sa mga ICP bilang may “pambihirang kultural, masining, at makasaysayang kahalagahan” sa bansa. Maaari silang makatanggap ng mga pondo mula sa gobyerno para sa proteksyon, konserbasyon, at restorasyon nito.
Inanunsyo rin ng Obispo ang plano ng Diocese na magpetisyon sa Holy See na italaga ang San Bartolome Parish Church bilang minor basilica. Kung maaprubahan, ito ang magiging kauna-unahang minor basilica ng diyosesis mula nang itatag ito noong 2003.