PINAG-NAKAWAN muna bago pinatay ang isang security guard ng isang resort sa Lucena, Quezon.
Natagpuang wala ng buhay ang biktima na nakilalang si Ivy Christian Ilagan Quizon, 37 anyos ng kapwa sekyu na si Ferdinand Rago ng ABS Resort, Purok Puting Buhangin Brgy. Cotta, Lucena City.
Ipinagbigay alam agad ni Rago sa Lucena City Police station ang nakitang biktima na wala ng buhay sa loob ng guard house bandang alas 6:00 ng umaga ng Linggo nang magpapalitan na sila ng duty.
Base sa imbestigasyon, may mga tama ng baril sa katawan ang biktima.
Nawawala din ang mahahalagang gamit ng biktima kabilang ang sling bag nito na may dalawang mobile phone, wallet, motor na Rusi tricycle at service firearm na shotgun na may serial no.18-5210 na nakarehistro sa Kandal Security Services.
Pinaghahanap na ang mga suspek habang patuloy pa na iniimbestigahan ang insidente.