Gagamitin ng Department of Health (DOH) ang kanilang savings para makabili ng Sinovac COVID-19 vaccines mula sa China.
Ito ang inihayag ni Health Secretary Francisco Duque III sa Laging Handa briefing kahapon.
Ayon kay Duque, aangkat sila ng bakuna ng Sinovac at 50,000 doses muna nito ang kanilang babayaran gamit ang kanilang savings.
“Ang paggagamitan po nu’ng [savings], sa Sinovac na aangkatin natin. Kaunti lang [muna] ito, 50,000 doses muna ang babayaran,” ani Duque.
Bilang dagdag aniya ito sa 600,000 doses ng Sinovac COVID-19 vaccine na donasyon ng pamahalaang Tsina sa Pilipinas.
Kaugnay nito, matapos namang ianunsiyo ni Duque na bibili ng Sinovac vaccine, inihayag na rin ng Food and Drug Administration (FDA) na inisyuhan na nila ang Sinovac ng Emergency Use Authorization (EUA).
Ayon kay FDA Director General Eric Domingo, ang efficacy rate ng Sinovac ay nasa mula 65.3 percent hanggang 91.2 percent sa mga malulusog na tao na nagkakaedad ng 18-59 anyos.