Natagpuang patay sa loob ng kanyang tindahan ang isang negosyanteng Intsik kahapon ng madaling araw sa New Market, Brgy. Cuta, Batangas City.
Nakilala ang biktimang si Chen Ling Ling, 34 anyos, isang Chinese national at negosyante.
Bandang alas 5 ng madaling araw kahapon nang matagpuan ng helper na si Roldan Logronio Yuga na wala nang buhay at nakahandusay sa sahig sa tabi ng kanyang kaha ng pera ang kanyang among si Ling. May mga tama ito ng saksak sa iba’t-ibang bahagi ng katawan.
Pagnanakaw ang tinitingnang pangunahing motibo ng mga kawatan, ayon sa inisyal na imbestigasyon ng mga pulis.
Pinag-aaralan na din ng mga awtoridad ang kuha ng CCTV sa lugar upang makita o makilala ang mga salarin.