Ngayong kakatapos lang ng Pista ng Itim na Nazareno, nagpaalala muli ang pamahalaang lungsod ng Maynila sa simbahan at mga residente hinggil naman ngayon sa pagdiriwang ng Kapistahan ng Poong Sto. Nino de Tondo.
Ayon kay Manila Mayor Isko Moreno, ipagbabawal muna ang anumang aktibidad na gagawin sa labas ng Sto. Nino de Tondo Parish.
Papayagan naman ang pagsasagawa ng mga misa basta’t masusunod ang itinatakdang seating capacity na 30 percent.
Ngunit ang mga prusisyon o parada at kahalintulad na mga aktibidad na ginagawa sa kalye ay hindi papayagan.
Ayon kay Yorme, kailangang mag-adapt ang mga tao sa “new normal” sa gitna ng patuloy na banta ng COVID-19.
Sinabi ng alkalde na dapat makinig din ang mga residente tulad ng nangyari sa Kapistahan ng Poong Itim na Nazareno.
Nagpapasalamat naman ang alkalde sa mga nakibahagi sa Pista ng Nazareno dahil karamihan ay sumunod at nakipagtulungan kaya nairaos ng maayos ang okasyon.
Sa abiso naman ng Archdiocesan Shrine of Santo Nino, ang mga misa kaugnay sa pista ay gagawin sa mga sumusunod na petsa at oras:
- January 16 – 3:00 ng hapon; 5:00 ng hapon at 7:00 ng gabi
- January 17 – 4:00 ng umaga; 6:00 ng umaga; 8:00 ng umaga; at 10:00 ng umaga, alas-12:00 ng tanghali; 3:00 ng hapon; 5:00 ng hapon at 7:00 ng gabi.