Kinakailangan munang sumalang sa swab test ang lahat ng mga Manileño na nagbakasyon sa labas ng Metro Manila bago sila payagang makabalik sa kanilang mga bahay.
Batay sa memorandum na pirmado ni Acting City Health Officer Arnold Pangan, simula ngayong araw ang lahat ng babalik sa Maynila mula sa kanilang mga bakasyon sa mga lalawigan ay ipasasalang sa swab test at papayagan lamang sila makauwi sa bahay kung negatibo ang resulta.
Sakaling magpositibo sa COVID-19 test ay didiretso sila sa quarantine facilities upang hindi na makahawa pa.
Gayunman, hindi na kailangan magpa-swab test ang mga indibidwal na isang araw lang nanatili sa labas ng Metro Manila subalit maari pa rin silang magpasuri kung nanaisin nila.
Ang swab test ay libreng ibibigay ng pamahalaang lungsod ng Maynila.