NAILIGTAS ang isang menor de edad na babae sa online abuse at sexual exploitation case sa Bacoor, Cavite at tagumpay na nasagip ng National Bureau of Investigation – Human Trafficking Division (NBI-HTRAD).
Ipinarating ang kaso ng Federal Bureau of Investigation (FBI) sa pamamagitan ng Philippine Internet Crimes Against Children Center (PICACC) na dali-daling kumilos ang NBI para sa imbestigasyon kaugnay sa dayuhang inaayusan at tinuturuan ang bata sa pakikipagtalik na ang mga larawan at videos ay ipinakakalat at ipinamamahagi sa online.
Nahanap ang kinaroroonan ng biktima sa ikinasang surveillance ng NBI-HTRAD, sa pakikipagtulungan ng NBI-Cavite North District Office (CAVIDO-North), at agad nakipag-ugnayan na rin sa Department of Justice –Inter Agency Council Against Trafficking (DOJ-IACAT), DOJ National Coordination Center against Online Sexual Abuse or Exploitation of Children and Child Sexual Abuse or Exploitation Materials (NCC-OSAEC-CSAEM), City Social Welfare and Development(CSWD)-Cavite, at Cavite Police Office.
Ipina-kustodiya sa CSWD ang nailigtas na biktimang menor de edad.
Base sa impormasyon, kasama ang mga kaanak sa ipaghaharap ng reklamong paglabag sa Republic Act 11930 (Anti-Online Sexual Abuse or Exploitation of Children (OSAEC) at Anti-Child Sexual Abuse or Exploitation Materials (CSAEM) Act,” kaugnay ng RA 10175 (Cybercrime Prevention Act of 2012) dahil sa pakikipagsabwatan sa hindi pa tinukoy na pagkilanlan at nationality ng suspek dahil sa nagpapatuloy pang operasyon.