BAGAMAN hindi ipinagbabawal, nagpa-alala ang lungsod ng Maynila sa mga magulang na huwag nang payagan ang kanilang mga anak na mangaroling ngayong Kapaskuhan.
Ayon kay Manila Mayor Francisco Domagoso, nasa gitna pa rin ng pandemya na dulot ng COVID-19 ang bansa, na maaaring maging panganib sa mga bata na nasa lansangan at nangangaroling.
Ayon sa alkalde, batid nitong sabik na ang mga bata na mangaroling lalo pa’t halos dalawang taong nananatili sila sa loob ng bahay ngunit kailangan din na mag-doble ingat maging ang bawat miyembro ng pamilya.
Samantala, sa full roll out ng pagbabakuna sa mga kabataan, hinimok ng alkalde ang mga magulang na pabakunahan ang kanilang mga anak laban sa COVID-19.
Sinimulan na ngayong araw ang pagbabakuna sa anim na district hospital sa lungsod.