IPINAGMALAKI ni Department of Health Secretary Francisco Duque III ang tuloy tuloy na pagbaba ng kaso ng COVID-19 sa bansa.
Sa Kapihan sa Maynila, ibinida pa ni Duque na pang-lima na lamang ang Pilipinas sa mga bansa sa Timog Silangang Asya pagdating sa dami ng kaso ng COVID-19.
Sinabi nitong mas mataas na ang mga kaso ng COVID-19 sa mga bansa tulad ng Thailand, Vietnam at Malaysia.
Ayon kay Duque, ito ang rason din kung bakit nananatili silang maingat pagdating sa pagluluwag kasama na ang pag-aalis ng patakaran sa pagsusuot ngface shields lalo na sa mga siksikan at kulob na lugar.
Malaki rin umano ang nagawang tulong ng pagbabakuna lalo na sa Metro Manila na sentro ng pagkalat ng COVID-19.
Gayunman, idinagdag nito na dapat pa rin sumunod ang publiko sa minimum public health standards upang hindi matulad sa United Kingdom at Israel na mas marami man ang nabakunahan pero tumaas muli ang mga kaso ng COVID-19 dahil sa ginawang pagluluwag.
Ang mga paghihigpit na ito ayon kay Duque ang ipinagpapasalamat nila kaya’t hindi umabot sa pinangambahang 40 hanggang 50 libo katao kada araw ang tinatamaan ng sakit sa bansa.