PATAY ang isang mag-lola sa nangyaring sunog na sumiklab sa residential area sa Block 39 Welfare-Ville Compound, Barangay Addition Hills sa Mandaluyong City.
Nakilala ang mga nasawi na sina Pacita Lamak, 55 anyos at apo nito na si Althea Salumbides, 13 taong gulang.
Sinasabing nasa ikatlong palapag ng bahay ang mag-lola ng sumiklab ang apoy sa ikalawang palapag ng kanilang tahanan.
Batay sa report ng Mandaluyong City-BFP, nagsimula ang sunog pasado alas dose ng madaling araw ng Huwebes, Pebrero 18, 2021 na umabot lamang sa unang alarma at ala 1:30 ng madaling araw ng idineklarang fire out ang sunog.
Pinaniniwalaang na-trapped ang mag lola sa kanilang kuwarto kaya hindi na nakalabas pa ang mga ito dahil sa sobrang kapal at maitim na usok.
Nakaligtas naman ang 6 na iba pang kaanak ng mga biktima habang inaalam pa ng mga awtoridad ang pinagmulan ng sunog.