Kasong frustrated homicide ang kinakaharap ngayon ng isang lalaking nalasing at nanghampas ng kahoy sa kanyang mga kainuman kagabi sa Brgy. Molino 3, Bacoor City, Cavite.
Natukoy ng Bacoor City Police Station ang suspek na si Jonel Cahigas y Waminal.
Ang mga biktima naman ay nakilalang sina Danilo Duazo y Janoras at Jenny Duazo y Ancheta.
Base sa salaysay, nagkainuman ang suspek at mga biktima sa Villa Maria, Brgy. Molino 3 bandang alas 11:33 kagabi.
Hiniling ni Jonel kay Danilo na sindihan ang kanyang sigarilyo ngunit tumanggi ito. Dahil dito, nagalit si Jonel at umuwi ng bahay.
Nang bumalik sa lugar ay may bitbit na itong dos po dos na kahoy. Kinompronta nito si Danilo at biglang hinataw sa kaliwang baywang habang si Jenny naman ay hinataw nito sa ulo saka mabilis na lumayo sa lugar.
Isinugod sa Las Pinas General Hospital and Trauma Center ang mga biktima upang gamutin.
Mabilis naman naaresto ng mga barangay tanod ang suspek na lango pa din sa alak.