NAKUMPISKA ng National Bureau of Investigation (NBI) ang tinatayang nasa P37.9 milyong mga pekeng coppermask sa mga tindahan sa Maynila at Pasay City, gayundin sa isang warehouse sa Binan, Laguna.
Nagreklamo umano ang JC Premiere Business International sa NBI at hiniling na imbestigahan at gumawa ng aksyon upang pigilan ang paglaganap at pamamahagi ng mga pekeng copper mask.
Ayon kay NBI Director Eric Distor, sa bisa ng isang search warrant na inisyu ng RTC Branch 46 ng Maynila ay sinalakay ang nasabing mga tindahan at warehouse dahil sa paglabag sa trademark infringement sa ilalim ng R.A. 8293 o ang “Intellectual Property Code of the Philippines.”
Sa kabuuan, tinatayang aabot sa halagang P37,956,680 ang mga nasabat na pekeng copper mask sa magkakahiwalay na lugar.
2021-02-09