Lumahok si Labor Secretary Silvestre Bello III sa panawagan ng publiko na hikayatin ang presidential daughter na si Sara Duterte-Carpio na tumakbo para sa 2022 national elections.
Sa pagbisita sa kalihim ni Daniel Nobleza, isang radio anchor at founder ng Inday Sara Cares Movement, binanggit nito na ang pangunahing layunin ng kanilang pagbisita ay upang makuha ang kanyang suporta tungkol sa pagtakbo ni Mayor Sara Duterte-Carpio bilang Pangulo sa susunod na eleksiyon.
Napansin din nila na may isang 2021 na calendar sa tanggapan ng kalihim na may campaign slogan na “Run Sara Run.”
“December pa ako namimigay niyang kalendaryo. Syempre Sara Duterte tayo sa 2022. Sana tumakbo na siya,” pahayag naman ng kalihim sa Sara Duterte volunteers.
“Hindi namin ito inaasahan, nakakatuwa na si Sec. Bello mismo ang nagsabing Duterte tayo! Sulit ang punta namin sa kanyang opisina. Thank you for your support aming masipag na DOLE (Department of Labor and Employment) Secretary,” dagdag ni Nobleza.
Pahayag pa ni Bello na panahon na para magtagumpay sa pamana ng kanyang ama si Sara Duterte at matupad ang lahat ng kanyang mga nakamit particular sa programang “Build, Build, Build,” mga pagpapaunlad sa aspeto ng transportasyon at ang pagbawi ng ekonomiya ng bansa.
“As of now, she (Sara Duterte) is still hesitant to run, pero publiko na ang humihiling para siya ay tumakbo.
“It’s her time for the presidency, sana tumakbo na ang ating susunod na presidente,” anang kalihim.