LAGUNA–Hinarang saka pinagbabaril ang sinasakyang van ng dalawang babae kahapon sa harap ng isang eskwelahan sa Biñan City, Laguna.
Kinilala ng hepe ng Biñan City Police Station na si PLt. Col. Vannie Martinez ang mga biktimang sina Ernee Grace Marie Uberas Cabisag at Honey Lee Ronomeron Algara.
Base sa ulat ng Binan City Police Station, bandang alas 6:40 ng gabi ay binabagtas ng dalawa ang kahabaan ng Biñan National Highway. Nang sumapit ang kanilang sinasakyang van sa Sto. Tomas Elementary School sa Brgy. Sto. Tomas ay may bigla na lamang sumulpot sa kanilang harapan na mga di pa nakikilalang lalaki.
Pinaulanan ng bala ang kanilang sinasakyang Nissan Navarra na may plate No. NCU 8121.
Matapos ang pamamaril ay tumakas patungong Carmona, Cavite ang mga kalalakihan.
Agad na dinala sa Carmona Hospital and Medical Center ang mga biktima ngunit idineklarang Dead on Arrival si Cabisag habang nasa mabuting kondisyon naman na si Algara.
Inaalam na ng Biñan CPS ang motibo sa nangyaring krimen.