Makatatanggap ng mas mataas na sweldo ang mga manggagawa sa pribadong sektor na magtatrabaho sa pagdeklara ng piyesta opisyal ngayong Pebrero, ayon kay Department of Labor and Employment (DOLE) Secretary Silvestre Belllo III.
Ito ay matapos na magpalabas ang ahensya ng Labor Advisory No.2, Series of 2021 na nagbibigay ng tamang pagbabayad ng sahod para sa idineklarang special non-working holiday sa Pebrero 12 o pagdiriwang ng Chinese New Year at sa ika-35 taon na paggunita naman ng anibersaryo ng EDSA People Power Revolution sa Pebrero 25.
Pinaalalahanan naman ni Bello ang mga empleyado na papasok sa nasabing araw ng holiday na dapat mabayaran ng karagdagang 30 percent ng kanilang basic salary sa unang walong oras.
Amg kanilang basic wage ay dapat naka-multiply ng 130 percent plus COLA o Cost of Living Allowance.
No-work, no-pay naman kaya kapag hindi pumasok ang isang empleyado sa nasabing araw maliban kung may paborableng polisiya ang isang kumpanya.
Karagdagang 30 percent ng kanyang hourly rate naman ang idadagdag sa sweldo ng manggagawa kapag sumobra sa walong oras ang kanyang trabaho.
Kung nataon naman na araw ng pahinga o day off at pumasok sa araw ng holiday, siya ay babayaran ng karagdagang 50 percent ng kanyang basic wage sa unang walong oras at kapag sumobra pa sa oras o overtime, karagdagang 30 percent pa rin ang idadagdag sa kanilang hourly rate.
Kaya ang komputasyon ay magiging hourly rate ng basic wage x 150 percent x 130 percent x bilang ng oras ng trabaho.