BAHAGYANG bumaba ang bilang ng mga pasyenteng may COVID-19 na nasa pangangalaga ng Manila COVID-19 Field Hospital sa Quirino Grandstand sa Maynila.
Sa pinakahuling tala kahapon, July 28, nasa 141 ang mga pasyente sa naturang field hospital o katumbas ng 41 percent ng 344-bed capacity ng pasilidad.
Mas mababa ito kumpara sa halos 200 pasyente na naitala noong nakalipas na linggo.
Base sa datos ng Manila COVID-19 Field Hospital, mula sa 141 na mga pasyente, mayorya ay mga Overseas Filipino Workers o OFWs habang dalawa lamang ang hindi OFW.
Dagdag ng pasilidad, karamihan sa mga pasyente ay hindi taga-Maynila.
Batay sa ulat, 102 sa mga pasyente ay asymptomatic, 39 ang may mild na kaso habang walang severe o kritikal ang kondisyon.
Pagdating sa vaccination status ng mga pasyante, 71 ang ganap nang bakunado kontra COVID-19, 15 ang partially vaccinated at 55 ang hindi pa nababakunahan kontra COVID-19.
Tiniyak naman ng Manila COVID-19 Field Hospital na mayroon pa rin silang sapat na personnel, kapasidad at kagamitan, gayundin ang oxygen inventory na nasa 119 pa ang reserba.