NASAWI ang limang taong gulang na babae sa sunog na sumiklab sa residential condominium kaninang madaling araw sa Barangay Tejeros, Makati City.
Batay sa ulat ng Bureau of Fire Protection-National Capital Region, maliban sa isang batang namatay sa sunog ay apat na miyembro ng pamilya nito ang nasugatan sa sunog.
Dakong ala-1:27 ng madaling araw nang sumiklab ang sunog sa Tejeros Bliss Building 2 sa H. Santos Street na umabot ng unang alarma.
Mahimbing umanong natutulog ang mag-anak nang may marinig na malakas na pagputok ang kapitbahay nito at saka nakitang kumalat ang apoy.
Aabot naman sa 10-libong piso ang halaga ng naging pinsala ng sunog na idineklarang fire out dakong alas-2:22 ng madaling araw.
Patuloy pang sinisiyasat ng BFP ang pinagmulan ng apoy bagamat sa paunang impormasyon ay naiwang nakasaksak na baterya ng e-bike sa sala ng bahay ang posibleng sanhi ng sunog.
