Bagong Rector ng Minor Basilica of the Black Nazarene sa Quiapo, itinalaga

Share this information:

ITINALAGA ng Kanyang Kabunyian Manila Archbishop Jose Cardinal Advincula ang ilang mga pari na mamumuno sa Minor Basilica of the Black Nazarene o Saint John the Baptist Parish sa Quiapo, Maynila.

Sa sirkular na nilagdaan ni Archdiocese of Manila Chancellor Isidro Marinay, itinalaga ni Cardinal Advincula si Fr. Rufino Sescon Jr. bilang Rector at Parish Priest ng basilica bilang kahalili ni Msgr. Hernando Coronel.

Itinalaga namang Parochial Vicars ng basilica si Fr. Jonathan Noel Mojica habang attached priest naman si Msgr. Jose Clemente Ignacio, ang kasalukuyang Vicar General/Moderator Curiae ng Archdiocese of Manila.

Kamakailan ay nagsimula na ring manilbihan sa Quiapo Church bilang attached priest si Fr. Hans Magdurulang matapos italagang Parish Administrator ng Nuestra Señora de la Soledad de Manila Parish si Fr. Douglas Badong na dating parochial vicar ng simbahan, habang attached priest ng Archdiocesan Shrine of Nuestra Señora De Guia sa Ermita naman si Fr. Daniel Voltaire Hui.

Bukod dito, itinalagang Parochial Vicar at Vice Rector ng National Shrine of St. Jude Thaddeus sa Malacañang Complex si SVD Missionary Fr. Antonio Wang Yuhang.

Inaasahang sa Oktubre at Nobyembre 2022 ay magkaroon nang pagpapalit ng liderato sa mga parokya ng Archdiocese of Manila matapos maabot ang itinakdang anim na taon na paninilbihan.

Naantala ang re-shuffling ng mga pari ng arkidiyosesis matapos italaga ni Pope Francis sa Vatican noong 2019 si noo’y Manila Archbishop Luis Antonio Cardinal Tagle.

Leave a Reply

This site uses Akismet to reduce spam. Learn how your comment data is processed.