Nasawi ang anak ng mayor ng isang bayan sa Batangas matapos banggain nito ang isang poste ng kuryente sa Brgy. Soro-Soro sa Batangas City kamakailan.
Nakilala ang biktima na si Mark Patrick Dimayuga, 21 anyos, at anak ni San Pascual, Batangas Mayor Antonio Dimayuga, na residente ng Brgy. San Mariano.
Isang sibilyan na nakilala bilang si Nelson Gutierrez, 22 anyos, at isang security guard, ang nasawi din matapos ang insidente.
Bandang alas 5:30 ng hapon noong Sabado, galing ang sasakyan na minamaneho ni Dimayuga sa Brgy. Concepcion at patungong Brgy. Balagtas, Batangas.
Pagsapit sa National Highway sa Brgy. Soro-Soro ay nawalan ito ng kontrol matapos nitong tangkain na mag-overtake sa isang sasakyan na nasa kanyang harapan.
Nasapol nito si Gutierrez na noon ay nakatayo sa gilid ng kalsada at naghihintay ng masasakyan saka bumangga ang sasakyan sa isang poste ng kuryente.
Nagtamo ng malalang sugat sa ulo si Gutierez na kanyang agad na ikinamatay.
Si Dimayuga naman ay agad na dinala sa pinakamalapit na pagamutan ngunit hindi na ito umabot pang buhay.