Pormal na binuksan kahapon ng hapon ang 1Bataan Malasakit Dialysis Assistance Center na matatagpuan sa Dinalupihan sa Bataan.
Ang naturang dialysis center ay siyang magiging sentro o magsisilbing “one-stop shop” para sa mga mahihirap na residente na nangangailangan ng tulong medikal at pinansiyal, lalo na ang mga nagda-dialysis at iba pang major sickness o diseases na kadalasan ay inihihingi ng tulong sa mga lokal na pamahalaan.
Ang 1Bataan Malasakit Dialysis Assistance Center ay bukas hindi lamang sa mga taga Dinalupihan kundi maging sa taga-ibang bayan ng Bataan at matatagpuan malapit sa Dinalupihan District Hospital.
Kasabay ng pagpapasinaya ng 1Bataan Malasakit Dialysis Assistance Center ay ang pagdiriwang ng kaarawan ni Dinalupihan Mayor Maria Angela “Gila” Garcia.
Ang pasinaya ay dinaluhan din nina Bataan Governor Abet Garcia, Vice Gov. Cris Garcia, mga hepe ng Provincial Health Office (PHO) at Municipal Health Office (MHO), iba pang health officials, medical frontliners, at mga ehekutibo mula sa Bataan Capitol.
Sa hinaharap ay nakatakda ring buksan ang kahalintulad na pasilidad sa bayan ng Mariveles para naman sa mga taga-Mariveles at mga taga Ikalawang Distrito na malapit sa naturang bayan.