Nagsagawa ng COVID-19 simulation exercise ang Manila Health Department (MHD) para sa mga senior citizen bilang paghahanda pa rin sa mass vaccination sa lungsod ng Maynila.
Ginawa ang aktibidad sa Legarda Elementary School, kung saan nakibahagi ang humigit-kumulang 100 na mga lolo at lola na pawang mga residente ng lungsod.
Ayon kay MHD Dir. Dr. Arnold Pangan, ito ay base na rin sa direktiba ni Manila Mayor Francisco “Isko Moreno” Domagoso upang matiyak na magiging plantsado ang immunization sa lungsod sa oras na dumating ang suplay ng mga bakuna para sa COVID-19.
Higit 157,000 ang mga senior citizen sa buong Maynila at malaki umanong hamon para sa lokal na pamahalaan ang pagbabakuna sa kanila ayon kay Dr. Pangan.
Gaya ng mga nakalipas na simulation, ginawa rito ang proseso mula sa registration, hanggang sa mismong pagturok ng mga bakuna.
Kabilang naman sa mahalagang ginawa sa simulation ay ang pagtukoy kung may kasalukuyang sakit ang mga senior citizen.
Inalaam din kung may nakakaranas ng high blood pressure, hika at iba pang underlying conditions na mahalagang malaman ukol sa vaccination.
Ang mga seniorn citizen sa Maynila ay kabilang sa mga prayoridad sa mass vaccination at ang mga bakuna ay libre.
Inaasahan naman ni Dr. Pangan na hindi lahat ay magpapa-bakuna dahil sa pangamba o alinlangan, kaya hinihimok nila ang mga lolo at lola na magtiwala sa pamahalaan.