Maraming mananampalatayang Katoliko ang dumalo sa misa sa Quiapo church sa Maynila kahapon bilang pag-gunita Ash Wednesday o “Miyerkules de Ceniza” o Miyerkules ng Abo at siyang hudyat ng pagsisimula ng panahon ng Kuwaresma.
Malaking tulong din ang pag-apruba ng Inter-Agency Task Force (IATF) sa pagtataas sa 50-porsyentong kapasidad para sa pagsasagawa ng religious activities dahil mas marami na ang nakakadalo sa mga banal na misa.
Tiniyak naman ng pamunuan ng simbahan ng Quiapo na sinusunod nila ang itinakdang kapasidad, gayundin ang pagpapatupad ng health at safety protocols upang matiyak na hindi magkukumpolan ang mga deboto sa simbahan.
Ang mga hindi nakapasok sa loob ay minabuting sa Plaza Miranda na lamang makinig ng misa habang ang iba naman ay nasa gilid ng simbahan sa bahagi ng Quezon Boulevard.
Sinabi naman ni Rev. Franklin Villaueva sa kanyang homiliya na ang Kuwaresma ay pagbabagong-buhay at kapag nagkasala ay importanteng magsisi at humingi ng kapatawaran.
Ang abo ay hindi naman ipinahid sa noo kundi ibinudbod ito sa ulo bilang pag-iingat at makaiwas sa physical contact.
Sang-ayon naman ang mga deboto sa pagbubudbod ng abo sa ulo dahil makakabuti umano ito para sa makaiwas nga sa physical contact.
Ang banal na isa ay nagsimula alas 4 ng madaling araw at ang huling misa ay ginanap alas 8 ng gabi.
Nilinaw naman ni Father Douglas Badong na hindi dagsa ang mga tao ngunit marami aniya at sakto lang para masunod ang social distancing.
“Hindi naman po dagsa mga tao. Maraming tao pero hindi po dagsa. Eksakto lang po para maintindihan ang social distancing. Maayos naman po at cooperative mga tao nagsisimba so far,” ayon sa text message ni Fr. Douglas Badong.