TINATAYANG nasa P1.4 bilyong halaga ng smuggled na sigarilyo ang nasabat ng Bureau of Customs (BOC) sa Sulu.
Resulta ito ng mas pinaigting na pagsisikap ng BOC na pigilin ang pagpasok ng mga kontrabando sa bansa.
Ayon kay Deputy Commissioner for Intelligence Group (IG) Juvymax Uy, nakatanggap ang Customs Intelligence and Investigation Service (CIIS) ng derogatory information ukol sa storage warehouse na naglalaman ng smuggled cigarettes.
Ininspeksyon ang naturang bodega at natuklasan ang 18,533 master cases ng assorted imported cigarettes na nagkakahalaga ng P1.4 bilyon kabilang ang Bravo, New Far, BPBM, Billionaire, Cannon, Souvenir, Astro, Wilcon, New D’ Premier, B&E Ice, at Fort.
Kasama ng BOC sa nasabing operasyon ang mga tauhan mula sa Western Mindanao Command-Armed Forces of the Philippines (WESMINCOM-AFP), 11th Infantry Division, Philippine Army (11ID P.A.), Philippine Air Force-Special Operations Wing (PAF-SPOW), Joint Task Force (JTF)-Sulu, Philippine Navy-Naval Special Operations Unit (PN-NAVSOU), at PN Naval Forces Mindanao.