POSIBLE pang mabago ang quarantine classification sa Metro Manila depende sa magiging apela ng mga local government units.
Ito ay matapos na palawigin ni Pangulong Rodrigo Duterte ang General Community Quarantine (GCQ) With Heightened Restriction sa Metro Manila hanggang Agosto 15.
Nauna nang sinabi ni Metropolitan Manila Development Authority (MMDA) Chairman Benhur Abalos na nagkasundo ang nga Metro mayors na isailalim ang buong National Capital Region (NCR) sa dalawang linggo na Enhanced Community Quarantine (ECQ) sa kundisyon na magbibigay ng cash aid ang pamahalaan at bibigyan sila ng 4 milyon na vaccine.
Ayon kay Department of Health (DOH) Secretary Francisco Duque III, kapag umapela ang mga pamahalaang lungsod ay pag-aaralan muli ng Inter Agency Task Force on Emerging Infectious Diseases (IATF) ang mga datos at metrics.
“Locking down is easy but you need to identify the social amelioration funds, for example, We are getting more data, more information as to, for example, the availability of social amelioration budget.” ani Duque.
Sakaling mabago umano ang quarantine classification sa Metro Manila ay posible itong ipatupad sa Agosto 1, 7 o 15.
Magsasagawa umano ng re-computation ang DOH upang matiyak na nadadagdagan ang vaccine na ipapamahagi sa Metro Manila kung saan may local transmission ng COVID-19 Delta variant.