Sugatan ang isang pintor matapos itong tagain ng isang construction worker sa Malabon City kamakalawa ng gabi.
Ginagamot sa Tondo Medical Center sanhi ng tinamong taga sa kanang tuhod ang biktimang si Claro Naga, 41 anyos, ng Sitio Kapatiran, Barangay San Isidro, Antipolo, Rizal.
Nakapiit naman ngayon habang nahaharap sa kaukulang kaso ang suspek na kinilalang si Pilo Ponce, 29 anyos, stay-in sa Lot 20, Carbonium St., Goldendate, Brgy. Tinajeros, Malabon City.
Lumabas sa imbestigasyon ng pulisya, dakong alas 8:40 ng gabi, nasa kanyang barracks sa Lot 20, Carbonium St. Goldendate ang biktima nang dumating ang suspek at sa hindi malaman na dahilan ay tinaga nito si Naga sa kanang tuhod gamit ang isang jungle bolo.
Matapos ang pananaga, mabilis na tumakas ang suspek subalit naaresto ito ng nagpapatrolyang mga barangay tanod sa Aracity Avenue, Brgy. Tinajeros nang makitang bitbit ang bolo na ginamit sa insidente habang isinugod naman ang biktima ng kanyang foreman na si Gener Soriano sa naturang pagamutan.