MATINDING kalungkutan ang dinaranas ngayon ng isang 56-anyos na ina matapos matuklasan niya na ang sarili pala niyang anak na 18-anyos na lalaki ang biktima sa nasaksihang malagim na pagpatay sa Malabon City, Huwebes ng madaling araw.
Nadiskubre ang walang buhay na katawan ni John Michael Legaspi, residente ng 258 Dulong Hernandez St. Brgy. Catmon ng mga barangay tanod na nakasubsob ang mukha sa madilim na bahagi ng Sacabica St., Dumpsite Brgy. Catmon kaya’t agad nilang inireport sa pulisya ang insidente.
Natutulog sa kanilang bahay ang ina ng biktima na si Emilinda Legaspi, isang biyuda, nang gisingin ng kapitbahay at ipinaalam sa kanya na natagpuang patay ang kanyang anak na lalaki sa Sacabica Street, ilang metro lang ang layo sa kanilang lugar.
Kaagad pumunta sa naturang lugar si Emilinda at laking gulat nito nang makita ang anak na nakasubsob ang mukha at may mga saksak sa iba’t-ibang parte ng katawan.
Sa pahayag ng ina ng biktima kina Malabon police homicide investigators P/SSgt. Ernie Baroy at P/Cpl. Renz Marlon Baniqued, dakong alas-3:30 ng madaling araw nang magising siya sa ingay na nag-udyok sa kanya na lumabas at nakita niya ang tatlong lalaki na hinihila ang isang lalaki ngunit nakilala lamang niya ang isa sa mga suspek na si Erron Fulgar, 31 anyos, dahil kapitbahay niya ito.
Palihim niyang sinundan ang mga ito hanggang sa makarating sa madilim na bahagi ng Sacabica St. kung saan nakita niyang pinagsasaksak ng mga suspek sa iba’t-ibang bahagi ng katawan ang biktima.
Dahil sa takot sa malagim na eksenang nasaksihan at baka makita siya ng mga suspek ay agad umuwi si Emilinda.
Ayon kay Malabon police chief P/Col. Albert Barot, nagsasagawa na ng hot pursuit operation ang pinagsamang mga tauhan ng Station Investigation and Detective Management Branch (SIDMB), Follow-Up Unit at Intelligence Section para sa posibleng pagkakaaresto kay Fulgar at sa dalawa nitong kasama.