TULOY-TULOY pa din ang paghigop o “siphoning” ng DSV Fire Opal sa natitirang langis mula sa lumubog na MT Princess Empress sa katubigan ng Naujan, Oriental Mindoro.
Ayon kay Philippine Coast Guard (PCG) Spokesperson, CG Rear Admiral Armand Balilo mula sa humigit-kumulang 800,000 litro na langis, nasa 120,000 hanggang 240,000 litro pa ang inaasahang hihigupin ng DSV Fire Opal.
Ang DSV Fire Opal ay dumating sa Calapan Anchorage Area Mayo 29 kung saan isinagawa ang boarding formalities saka sinimulan ang siphoning.
Pagbabahagi ni Incident Management Team-Oriental Mindoro (IMT-Ormin) Commander, CG Commodore Geronimo Tuvilla, maaaring abutin ito ng 20 hanggang 30 araw, depende sa lagay ng panahon at “subsea progress.”
Ang DSV Fire Opal ay “chartered” ng Malayan Towage and Salvage Corporation at kinontrata naman ng Protection and Indemnity Insurance Club.
Mayo 19 nang maglayag ito mula Singapore at nakarating sa Subic Bay Freeport Zone noong Mayo 26, 2023 bago dumiretso sa katubigan ng Oriental Mindoro.