Aabot sa halagang P50 milyon ang nasabat ng Customs Intelligence and Investigation Service (CIIS) ng Bureau of Customs (BOC) port of Cagayan de Oro na mga puslit na sigarilyo lulan ng dalawang container van mula China.
Ang kahon-kahong smuggled na sigarilyo ay idineklara umanong furniture na naka-consigned naman sa LMRC 418 Direct Import Export Corp.
Dumating ito sa bansa noong Pebrero 14, 2021 sa Mindanao Container Terminal (MCT) sa Tagoloan, Misamis Oriental.
Sa pamamagitan ng natanggap na impormasyon kaugnay sa kargamento isang Pre-Lodgement Control Order ang inisyu ni District Collector John Simon ng Port of Cagayan de Oro base na rin sa rekomendasyon ng CIIS.
Nang inspeksyunin, nadiskubreng mga puslit na Marvel at Two Moon branded cigarettes ang laman ng container van at hindi furniture.
Pinuri naman ni District Collector John Simon ang CIIS CDO Field Station sa pangunguna ni IO1 Oliver Valiente dahil sa patuloy na pagiging bigilante sa pagbabantay sa border.
Samantala, nag-isyu na ng Warrant of Seizure and Detention para sa shipment na nakatakdang sirain.