WALA nang buhay nang matagpuan sa loob ng isang detention facility si dating Ozamiz City Councilor Ricardo “Ardot” Parojinog.
Batay sa ulat mula sa PNP, dakong alas-sais ng umaga nang makitang walang buhay sa kanyang piitan sa Ozamiz City Police Station si Parojinog.
Sa paunang pagsisiyasat, wala umanong senyales ng dahas o pananakit sa katawan ng detenido.
May nakatakda sanang pagdinig ngayong araw sa Ozamiz City Court si Parojinog para sa mga kasong kinakaharap nito.
Si Parojinog, na kapatid ng napatay na suspected drug lord na si Ozamiz City Mayor Reynaldo Parojinog Sr., ay nahaharap sa mga kasong murder, illegal possession of firearms at illegal possession of explosives.
Ipinag-utos na ni PNP Chief Police General Camilo Cascolan ang malalimang imbestigasyon sa pagkakamatay ni Ardot Parojinog.
Inatasan din nito si Provincial Regional Police 10 Director Brigadier General Rolando Anduyan na ilagay ang Ozamiz City Police chief at lahat ng night shift duty personnel sa restrictive custody. Pinaiimbestigahan din ang PNP Custodial Center security team sa ilalim ni Lieutenant Colonel Jiger Noceda.