NAPUNO ng demonstrador ang Padre Faura sa Taft Avenue Maynila matapos magsagawa ng kilos protesta ang ilang mga grupo kaugnay sa gagawing oral argument mamayang hapon sa Korte Suprema hinggil sa Anti-Terrorism Law.
Dahil sa pagbuhos ng kilos-protesta, nagdulot naman ito ng matinding pagsisikip ng daloy ng trapiko kung saan isang linya na lamang ng southbound lane ng Taft Avenue ang dinaraanan ng mga motorista matapos isara ng pulisya ang Padre Faura.
Kabilang sa mga grupo na nagsagawa ng protesta ang mga kasapi ng Iglesia Filipina Independiente at iba pang mga grupo.
Mayroon namang isang effigy ni Pangulong Rodrigo Duterte sa Padre Faura bilang pagpapakita sa malaking pagtututol ng mga demostrador sa Anti-Terrorism Law.
Sa gitna naman ng banta ng COVID-19 at bagong variant ay hindi na nasunod ang health protocol tulad ng social distancing dahil nagdikit-dikit na ang mga nagpo-protesta kung saan karamihan sa mga ito ay wala pang suot na mga face shield.