ANG pagpapatupad ng “No Vaccine, No Salary” na polisiya ng ilang employer ay labag sa batas, ayon sa Department of Labor and Employment (DOLE).
Ito ang nilinaw ni DOLE Secretary Silvestre Bello III matapos marinig sa media interviews ang kinatawan ng Associated Labor Unions -Trade Union Congress of the Philippines (ALU-TUCP) na may ilang mga employer ang hindi nagbibigay ng sahod dahil hindi bakunado ang ilang empleyado.
Ayon kay Bello, ilegal ang naturang polisiya at inaabisuhan ang mga empleyado na ireport sa DOLE ang mga employers na nang iipit ng sahod.
“Bawal yan. Labag sa batas nga ‘yan. You cannot withhold the salary of the employee, of the worker without legal basis,” ani Bello.
Sa ngayon ay wala pa naman silang natatanggap na reklamo kaugnay sa ganitong usapin at narinig lang nila ito sa radio interviews.