HINDI umano nagmamadali ang National Bureau of Investigation (NBI) na tapusin ang report kaugnay sa pagkamatay ng flight attendant na si Christine Dacera.
Ayon kay Department of Justice (DOJ) Sec. Menardo Guevarra, patuloy ang NBI sa mga isinasagawang DNA test.
Aniya, tiyak naman na maisusumite ng NBI ang report bago pa matapos ang preliminary investigation ng Makati Prosecutor’s Office.
Paliwanag ni Guevarra, nais ng NBI na masagot ang lahat ng misteryo sa pagkamatay ni Dacera kaya mas maingat ito sa imbestigasyon.
Magugunitang idineklara ng Makati Police na rape with homicide ang Dacera case subalit matapos ang ilang linggo ay inilabas ang medico-legal report na natural death ang ikinasawi ni Dacera.
Hindi naman tinanggap ng kampo ni Dacera ang findings ng Philippine National Police (PNP) at iginiit na inabuso at pinatay si Dacera.