PINAPIPIGIL ng Presidential Commission for the Urban Poor (PCUP) ang nakaambang demolisyon at ebiksyon sa Barangay Potrero, Malabon City bunsod ng pagpapatupad ng Waterways Project dahil sa hindi nito pagdaan sa ligal at wastong proseso.
Ayon kay PCUP Chairman at CEO, Undersecretary Alvin Feliciano, hindi dumaan sa tamang proseso ang nakatakdang paggiba sa mga kabahayan na matatagpuan sa gilid ng Tullahan River.
Sinabi rin ng opisyal na lumiham na siya sa City Administrator ng Malabon at sa National Capital Region Police Office (NCRPO) upang pigilan ang demolisyon, na iligal dahil hindi pa tapos ang Pre-Demolition Conference (PDC) na isinasagawa ng PCUP.
Ipinahayag ni Usec. Feliciano na malinaw na nakasaad sa Department of the Interior and Local Government (DILG) Memorandum No. 2017-18 na kailangan matapos ang naturang proseso bago isagawa ang paggiba, alinsunod din sa Urban Development and Housing Act (UDHA).
Tinatayang aabot naman sa 147 pamilya ng informal settlers sa Barangay Potrero, Malabon ang nanganganib na mawalan ng tirahan dahil sa Waterways Project ng pamahalaang lokal.
Ipinaalam ni Usec. Feliciano na alinsunod sa DILG Memorandum, “pinagdidistansiya” ang mga pulis hangga’t walang ipinapalabas na PDC Certificate sa lugar na target ng demolisyon at ebiksyon