HINDI muna papapasukin ng National Capital Region (NCR) ang mga residente ng Metro Manila na naabutan ng implementasyon ng enhanced community quarantine (ECQ).
Ayon kay Philippine National Police (PNP) chief Police General Guillermo Eleazar, kailangang hintayin na mga residente na matapos ang pag-iral ng ECQ o hanggang Agosto 20 bago makauwi ng Metro Manila.
“Patapusin muna ang ECQ. Puwede na ‘yun kung GCQ (general community quarantine) na,” ayon kay Eleazar.
“Maghihintay na sila ng after ng ECQ. In fact even last week noong nag-transition tayo from GCQ with heightened restrictions to GCQ with heightened and additional restrictions eh ‘yun eh ni-launch natin, ‘yung border, ‘yung outer perimeter ng NCR Plus,” dagdag ng heneral.
Gayunman, nilinaw ni Eleazar na ang mga authorized person outside residence (APOR) o essential workers lamang ang papayagang pumasok ng NCR.
“Ayaw natin magkaroon ng exodus na lalabas at papasok dito except for those who belong to worker APOR na ina-allow natin pumasok,” paglilinaw ng PNP Chief.
(Photo Courtesy: DZBB Mark Makalalad)