Nagpahayag ng pagsuporta kay Manila Mayor Francisco “Isko Moreno” Domagoso ang Philippine Navy para sa vaccination rollout ng COVID-19 sa lungsod.
Ito ay kasunod ng naging pagpupulong ni Domagoso kasama si Col. Ivan Papera ng Joint Task Force-National Capital Region (JTF-NCR) OIC at Commanding Officer ng Naval Task Group kasama ang iba pang top JTF-NCR officials.
Sa naturang pulong, sinabi ni Domagoso na tinatanggap niya ang karagdagang seguridad na inaalok sa panahon ng proseso ng pagbabakuna.
Aniya, isang kritikal na elemento sa vaccine rollout ang pagtransport ng bakuna mula sa storage facility sa Sta. Ana hospital patungo sa itinalagang vaccination sites sa buong lungsod.
“Malaking bagay especially [sa] security ng bakuna, kasi yung transport from our storage facility sa Sta. Ana,” ayon sa alkalde kung saan sinabi pa na ang deployment sites ay maaring 18 hanggang 27 sites depende sa bilang ng bakuna.
Bukod sa karagdagang seguridad sa vaccination rollout, mungkahi rin ni Papera ang joint simulation exercise kasama ang Manila Disaster Risk Reduction Management Office (MDRRMO) sa preparasyon ng “The Big One” at iba pang posibleng sakuna.
Ipinaliwanag ng opisyal na sa worst-case scenario matapos ang malakas na lindol, maraming istraktura ang magko-collapse.
“As such, the only option would be to set up the command post in the water.” ayon pa kay Papera.
Kasama rin sa nasabing pagpupulong sina Capt. Julius Valdez, PN; Lt. Col. Ramil Holgado, PN; at Ens. Jerick Naval, PN.