Ipinag-utos na ng pamahalaang lungsod ng Maynila ang pagpapatupad ng mas mahigpit na health protocols sa kalsada at mga barangay.
Kasunod ito ng ginanap na directional meeting na pinangunahan ni Manila Mayor Francisco “isko Moreno” Domagoso kasama si Manila Police District (MPD) Director P/Brig. General Leo Francisco at mga station commander kung saan ipinag-utos ng alkalde ang mahigpit na pagpapatupad ng health protocol upang matigil ang tumataas na bilang ng kaso ng COVID-19 sa lungsod.
Inatasan din ng alaklde si Manila Barangay Bureau director Romeo Bagay na i-lockdown ang alin mang barangay na patuloy ang paglobo ng mga kaso ng COVID-19.
Kinakailangan lamang aniya na makipag-coordinate kay Francisco para sa security plan.
Inatasan din ng alkalde na umikot ang mga tauhan ng Manila Traffic and Parking Bureau (MTPB) na siyang magsisilbing taga sita o COVID-19 Marshals at magsasaway ng mga pasaway sa kalsada.
Ang naturang mga utos ay gagawin aniya ng tuloy-tuloy, walang patid, lalo na sa susunod na dalawang linggo.
Dagdag pa ni Domagoso sa ibang departamento ng pamahalaang lungsod na ihanda ang pagdedeliver ng monthly food boxes para sa buwan ng Marso para sa lahat ng 700,000 mga pamilya sa lungsod.