TINATAYANG aabot sa mahigit P200 milyong halaga ng counterfeit luxury brand products ang nakumpiska ng National Bureau of Investigation – National Capital Region (NBI-NCR) sa anim na establisimiyento sa Greenhills Shopping Center sa San Juan City.
Nalaman na nag-ugat ang reklamo na inihain sa NBI-NCR dahil sa paglaganap at pamamahagi ng mga pekeng produkto sa merkado.
Agad nakakuha ang NBI-NCR ng search warrant na inisyu ng Manila RTC Branch 46 laban sa dalawang establisimiyento ni Peter Uy Perez General Merchandise at apat pang establisimiyento ng 769 Leather Goods Trading at Mylene P. Sy.
Ipinatupad ang search warrant noong April 15 sa nasabing establisimiyento na nagresulta ng pagkakumpiska sa mga counterfeit bags, footwear, jewelry, at relo na may trademark ng Chanel, Hermes at Rolex na tinatayang aabot sa kabuuang halagang P223,866,715.