ARESTADO ang isang lalaki matapos itong mahulihan ng marijuana na nasa mahigit dalawang kilo ang bigat at may estimated street value na P354,000.
Kinilala ng Manila Police District-Police Station 2 (MPD-PS 2) ang suspek na si Judem Aleck Padilla, 27 anyos, binata at residente ng 358 C.M Recto Street Brgy 14, Tondo, Manila.
Siya ay naaresto sa kahabaan ng Asuncion kanto ng Recto Street sa Tondo nang magsagawa ng Oplan Sita ang mga tauhan ng Asuncion PCP.
Wala umano itong suot na facemask kaya sinita at kinapkapan pati ang bitbit na anim na kahon ay ininspeksyon kung saan natagpuan ang marijuana sa loob ng speaker.
Patuloy ang imbestigasyon ng pulisya kung sino ang supplier ni Padilla ng marijuana.