UUNGKATIN na rin sa pamamagitan ng “inquiry” in aid of legislation na pangungunahan ng House Commmitte on Dangerous Drugs kaugnay sa “misencounter” sa pagitan ng mga operatiba ng Quezon City Police District at Philippine Drug Enforcement Agency (PDEA) sa Commonwealth, Quezon City.
Ito mismo ang ipinahayag ni Surigao del Norte Representative Robert Ace Barbers, na siyang chairman ng naturang komite.
Ayon kay Barbers, magdaraos sila ng sarili nilang pagiimbestiga upang hindi na maulit ang kahalintulad na kaso.
Sinabi ng mambabatas na “very unfortunate” umano ang nangyaring engkwentro kung saan nasawi ang dalawang pulis at isang ahente ng PDEA.
Ani pa ni Barbers, na may kanya-kanyang bersyon ang QCPD at ang PDEA, na kapwa nagsabing lehimitimo ang kanilang operasyon.
Pero giit ni Barbers, kung ganito ay dapat walang naganap na engkwentro dahil batay sa section 86 ng Republic Act 9165 o Comprehensive Dangerous Drugs Act of 2002 ay dapat may koordinasyon bago magsagawa ng anti-drug operation.
Sa nangyari, ani Barbers, tila walang koordinasyon sa pagitan ng QCPD at PDEA.
Sinabi ni Barbers na kabilang din sisilipin ng lupon ay ang alegasyon “sell bust”, na kung totoo ang ilegal.
Kabilang pa sa anggulo na titingnan ng House Committee on Dangerous Drugs ay ang presensya ng high-ranking police officers sa “uncoordinated” na buy bust, na nakadagdag sa iregularidad sa scenario, wika pa ni Barbers.