BATANGAS–Nasabat ang mahigit P1-milyon halaga ng hinihinalang shabu sa isang pusher kagabi sa Brgy. Marawoy, Lipa City, Batangas.
Sa ulat na nakarating kay Batangas Provincial Director P/Col. Rex Arvin Malimban, nakilala ang suspek na si Aries Ryan Morales Alikpala alyas Julio, 35 taong gulang, at residente ng Block 17, Villa De Lipa 1 Subdivision, Brgy Marawoy, Lipa City, Batangas
Nahuli si alyas Julio sa isinagawang buy-bust operation ng mga operatiba ng Lipa City Police Station Drug Enforcement Unit (DEU) bandang alas 8:35 ng gabi kagabi (Enero 11) kung saan isang nagpanggap na pulis ang umaktong bibili ng shabu sa nasabing suspek.
Nang kumuha ito ng droga, dito na nagpakilalang pulis ang kanyang ka-transaksyon.
Agad na narekober sa suspek ang isang plastic bag na naglalaman ng 200.08 gramo ng hinihinalang shabu na tinatayang higit kumulang P1.3 milyon ang halaga at P100,000 marked money.
Napag-alaman na kilala ang suspek bilang “big-time” pusher sa kanilang lugar. Inaalam na ng mga awtoridad kung saan nanggagaling ang ilegal na droga na kanyang ipinagbibili.
Sa ngayon ,nakapiit na sa Lipa City Police Station ang nasabing suspek at nahaharap sa kasong paglabag sa Republic Act 9165 o Comprehensive Dangerous Drugs Act of 2002.