INIREKOMENDA na ni Eric Distor, OIC Director ng National Bureau of Investigation (NBI) ang pagsibak sa puwesto kay Assistant Regional Director Vic Lorenzo bilang pinuno ng NBI-Cybercrime Investigation and Assessment Center (CIAC) at iba pang mga opisyal ng Cybercrime Division (CCD) dahil sa umano’y maanomalyang operasyon habang nakabinbin ang resulta ng imbestigasyon ng NBI Internal Affairs Division (IAD).
Ipinag-utos din ni Distor na repasuhin ang umiiral na cybercrime at iba pang operational guidelines at procedures para magkaroon ng mas organisadong pamantayan at hakbang kaugnay ng mga operasyong isinasagawa ng iba’t ibang operational units ng NBI sa buong bansa.
Sa pagbibigay ng kanyang direktiba, sinabi ni Distor na muling susuriin ng NBI ang mga alituntunin ng ahensya sa mga operasyon kabilang ang serbisyo ng Search Warrant operations, Intelligence operations, at investigation operations.
Binigyang-diin din ni Distor na simula ngayon, ang lahat ng awtoridad sa pagpapatakbo ay dapat magmula sa tanggapan ng direktor at dapat nasa ilalim ng kontrol at pangangasiwa ng nasabing tanggapan, sa tulong ng kani-kanilang Deputy Directors.
Idinagdag niya na ang lahat ng Regional Directors, Agents-In-Charge at Central Office Chiefs ay inutusan din na isumite sa Office of the Director ang kanilang performance/accomplishment reports para sa pagsusuri.
Ipinaliwanag ni Distor na ang muling pagtatasa at pagrepaso sa mga alituntunin sa pagpapatakbo ng NBI ay naglalayon din na bawasan ang pang-aabuso sa awtoridad upang hindi mag-iwan ng puwang para sa mga isyu sa tiwala at integridad at pataasin ang propesyonalismo sa mga operatiba.
Gayundin upang higit na mapalakas ang patuloy na tagumpay ng NBI sa paglaban sa mga krimen at mga ipinagbabawal na aktibidad ng may pinakamataas na kahusayan at bisa.
Idinagdag ni Distor na ang pagsusuri ng mga pamantayan sa pagpapatakbo at mga pamamaraan na pana-panahong isinasagawa ay laging kailangan bilang bahagi ng pagtugon ng pamamahala sa pagtaas ng papel ng NBI sa mga hamon sa isang moderno at highly technologically advanced na lipunan.
Ipinunto pa ni Distor na isasagawa ang tuloy-tuloy na paglilinis sa mga tauhan ng NBI para mapanatili lamang ang mga highly skilled, competent at deserving, at idinagdag na hindi niya kukunsintihin ang unprofessionalism sa NBI.