Boboykotin ng lahat ng sektor ng magsasaka ang Food Security Summit ng Department of Agriculture (DA) na gaganapin sa Mayo 18 at 19.
Ito ang inihayag ni Nicanor Briones, National Chairman ng Pork Producer Federation of the Philippines makaraang magkasundo ang ibat-ibang samahan na huwag dumalo sa ipinatawag ni DA Sec. William Dar na food congress o summit.
Sinabi ni Briones na wala rin namang mangyayari kahit makipag-usap sila kay Dar dahil hindi naman ito nakikinig sa kanilang suhestyon tuwing sila ay nagpupulong.
“Wala siyang kuwentang kausap,” tahasang sinabi ni Briones.
Ayon pa kay Briones walang pagmamahal at malasakit si Dar sa mga magsasaka.
Sa halip na dumalo sa Food Security Summit, magsasagawa umano ng hiwalay na Food Congress ang mga producer ng baboy, baka, manok, palay, gulay, isda at iba pa para bumalangkas ng mga hakbang at solusyon sa usapin ng produksyon, suplay at presyo.
Ang mga rekomendasyon na mabubuo aniya ay kanilang isusumite sa Senado, Kamara at Malakanyang.