INIREKOMENDA ng Department of Health (DOH) ang isang linggo pang pagpapairal ng enhanced community quarantine (ECQ) sa Metro Manila at kalapit na mga lalawigan, kabilang ang Cavite, Rizal, Bulacan, at Laguna.
Gayunman, ayon kay Health Undersecretary Maria Rosario Vergeire, hindi pa isinasapinal ng nasabing rekomendasyon at patuloy na pinag-aaralan ng Inter-Agency Task Force on the Emerging Infectious Diseases.
“Extension for another week was recommended but nothing is final and IATF works in a whole of government approach. There will be an assessment of the progress before ECQ ends,” pahayag ni Vergeire.
Sinabi ni Vergeire na may isinasagawa nang cost-benefit analysis ang DOH at ang National Economic and Development Authority (NEDA) patungkol sa posibleng epekto ng ECQ extension sa ekonomiya at public health.
“The ideal would really be two weeks so that we can be able to see that effect that we would want,” dagdag pahayag ni Vergeire sa isang panayam.
Posible aniya na bago matapos ang ECQ sa Abril 4 ay matatapos na ang assessment ng mga ahensya ng gobyerno upang matukoy kung kakailanganin ang pagpapalawig ng ECQ.