Hawak na ng Department of Health (DOH) ang flight manifest na makakatulong sa contact tracing upang matukoy ang mga nakasalamuha ng Pinoy real-estate agent na nagpositibo sa UK variant ng COVID-19.
Ayon kay DOH Usec. Ma. Rosario Vergeire, sinimulan na ang contact tracing sa mga close contacts ng 29 anyos na Pinoy na nanggaling sa Dubai, United Arab Emirates (UAE).
Sa ngayon ay may pneumonia ang nasabing Pinoy at nasa isolation facility sa Quezon City.
Nabatid na nasa 259 pasahero ang sakay ng eroplano galing Dubai, at nasa 58 porsiyento na sa mga ito ang nakontak na ng DOH at sumailalim na rin sa quarantine.
Ang Pinay girlfriend ng real-estate agent na kasamang bumiyahe sa Dubai ay nag-negatibo naman sa swab test subalit muli siya isasalang sa COVID test.
Hindi naman masabi ng DOH kung saan nakuha ng pasyente ang virus dahil pinag-aaralan pa ang mga naging aktibidades niya sa Dubai.
Disyembre 27 nang umalis sa bansa ang naturang Pinoy at bumalik.nitong Enero 7 at dumiretso sa isang hotel bilang protocol.