Dalawa pang miyembro ng Archdiocese of Cebu ang nagpositibo na rin sa coronavirus disease 2019 (COVID-19), kasunod nang pagpopositibo sa sakit kamakailan ni Cebu Archbishop Jose Palma.
Batay sa ulat, isinugod sa pagamutan sina Auxiliary Bishop-Emeritus Antonio Rañola at Fr. Russel Sungcad, na team member ng Alliance of Two Hearts Church sa Banawa, Cebu City.
Nabatid na si Rañola ay isinugod sa ospital noong Biyernes ng umaga sa matinding pag-ubo na dulot ng virus.
Maayos naman na umano ang vital signs nito at masusi nang binabantayan ng mga doktor.
Matatandaang una nang kinumpirma ng Cebu Archdiocese na dinapuan ng virus si Archbishop Palma.
Nasa maayos naman na umano ang kondisyon nito ngunit masusi pa ring binabantayan ng mga doktor.
Kaugnay nito, umaapela naman ang archdiocese sa mga mananampalataya ng patuloy na panalangin para sa tuluyang ikagagaling ng naturang mga obispo at pari.